Kuri uyu wa mbere, tariki ya 21 Nyakanga 2025, mu Kagari ka Gakoni, Umurenge wa Kiramuruzi, Akarere ka Gatsibo, habereye umuganda udasanzwe wo gutangiza ku mugaragaro igikorwa cyo kubakira uwarokotse Jenoside yakorewe Abatutsi muri Mata 1994 utishoboye.

Iki gikorwa cyatangijwe n’Intore mu Ikoranabuhanga zikorera mu Ntara y’Iburasirazuba, nyuma yo kwishyira hamwe no gukusanya ibikoresho by’ibanze bikenewe mu kubaka. Binyuze mu bufatanye n’ubuyobozi bw’Intara ndetse n’inzego z’ibanze, batoranyije umugenerwabikorwa utishoboye warokotse Jenoside yakorewe Abatutsi, kugira ngo yubakirwe. 

Umuganda wo gutangiza iki gikorwa witabiriwe n’Intore mu Ikoranabuhanga zaturutse mu karere ka Gatsibo, ndetse n’abayobozi b’ intore mu ikoranabuhanga muri buri Karere ko mu Ntara y’Iburasirazuba, hamwe n’ uhagarariye gahunda y’ intore mu ikoranabuhanga mu Ntara y’ Iburasirazuba ndetse n’abaturage baturanye n’umugenerwabikorwa.

Mu muganda habumbwe amatafari azakoreshwa mu kubaka, hanasizwa ikibanza ahazubakwa iyo nzu, mu gihe ibikorwa nyir’izina byo kubaka biteganyijwe gutangira vuba amatafari amaze kuma. Biteganyijwe ko inzu izuzura mu gihe kitarenze amezi abiri, kandi ikazashyikirizwa nyirayo ku mugaragaro.

Iki gikorwa ni ikimenyetso cy’ubumwe n’ubufatanye biranga urubyiruko rw’Intore mu Ikoranabuhanga, mu gufasha Leta gushakira umuti bimwe mu bibazo bigaragara mu muryango nyarwanda, by’umwihariko abarokotse Jenoside yakorewe Abatutsi. Binagaragaza uruhare rw’urubyiruko mu kubaka u Rwanda rufite ahazaza hihuta mu iterambere, ryubakiye ku ndangagaciro zo gufashanya no kwishakamo ibisubizo.